РУСКИ КЕРЕСТУР – Нєшка ше у парохиї св. оца Миколая означує швето Богоявленя Господнього, у народзе волане Трокралї. Вчера ше означела трокральова Вилїя, дзень на котри ше вирни притримую звичайох котри подобни як и на крачунску Вилїю, зоз подобнима єдлами.
Служби ше будзе служиц як на швето, на 8 годзин, 10 и на 17 годзин, з тим же ше после Служби Божей на 10 годзин будзе пошвецац вода. После тей Служби у порти людзе годни набрац швеценей води, котру познєйше похасную у своїм обисце, медзи иншим и за пошвецанє обисцох, котре почина 9. януара од Велького шору. Розпорядок пошвецаня мож пренайсц на огласней табли у порти, лєбо ту опатриц.
У манастире на Циґлашоре того дня тиж будзе Служба Божа зоз пошвецаньом води, та и вирни котри приходза до манастиру годни себе дому однєсц швеценей води.