ВИЗИЧ/НЕШТИН – Право на транзит-преход през Горватску до Сербиї, лєм прейґ одредзених гранїчних преходох, буду мац особи хтори то докажу зоз даєдним документом зоз роботи, школи, од дохтора…
Нештин и Визич одвше припадаю општини Бачка Паланка, то два валали хтори прейґ Дунаю од сримского боку, та же би гражданє сцигли до матичней општини муша прейсц 5 километри през Републику Горватску. То нє бул проблем док ше нє почало применьовац ЕЕС систему, та ше кажди преход през Горватску сербским державяном зоз Нештину и Визичу тераз рахує як пребуванє у Шенґен зони.
Обичному чловекови чежко задумац же кажди дзень муши прейсц гранїцу Европскей униї, указац пасош, прейсц царину же би пошли на роботу, до дохтора, школи, або на свойо польо. После вецейдньових блокадох драгох и на билатераних розгваркох министра нукашнїх дїлох Републики Сербиї Ивици Дачича и горватского министра нукашнїх дїлох Давора Божиновича потвердзене же право на транзит-преход през Горватску до Сербиї, лєм прейґ гранїчних преходох Илок – Бачка Паланка, Илок II – Нештин, Принциповец – Сот, Принциповец II – Люба, буду мац особи хтори то докажу зоз даяким документом – папером зоз роботи, потвердзеньом зоз школи, звитом од дохтора.
Тирваце ришенє, хторе би олєгчало живот гражданом Бачкей и Сриму то правенє нового мосту медзи Нештином и Бачку Паланку.
Мост би мал и реґионале значенє, бо би бул найкратша вяза медзи сиверо-заходну часцу Войводини и авто-драгу Беоґрад-Заґреб, найкратша вяза зоз Републику Сербску, прейґ ґранїци Сримска Рача.
Република Сербия твердзи же у Бачкей Паланки урядово почало реализованє проєкту вибудови мосту прейґ Дунаю, бо Влада Сербиї 30. децембра 2025. року подписала контракт о вибудови моста – лєм проєкт кошта 15,23 милиярди динари (коло 130 милиони евра), а кельо будзе коштац мост и приход ґу ньому нєт податки.