За розлику од свойого младшого брата, успишного атлетичара Михаила Дудаша, Иван од вше векшу прихильносц и интересованє указовал ґу компютером як ґу спорту.
Иван Дудаш, родом з Нового Саду, закончел Факултет за услужни бизнис (ФАБУС) у Сримских Карловцох, а свойо перши професийни крочаї правел як проєкт-менаджер тимом хтори робели на системох за акредитацию (за меранє часу и бодованє хторе ше приказовало на семафору) на рижних европских и шветових спортских змаганьох, звичайно студентских.
Медзитим, понеже коло 2010. року, ИТ индустрия у Новим Садзе була лєм у розвою, векшина наших фирмох була ориєнтована на аутсорсинґ. З другима словами, нашо людзе и фирми углавним робели за рижни фирми зоз иножемства, їх проєкти нє були таки комплексни, мали директни контакт зоз своїма клиєнтами, та нє було анї потреби анґажовац проєкт менаджера. Понеже ше Иванови нє удавало найсц роботу у фаху, почал озбильнєйше роздумовац о одходу до водзацого центру за технолоґиї – Лондону. Там мал родзинових и приятельох хтори му були велька помоц и потримовка по приходу.
– Анґлию сом вибрал першенствено пре язик, понеже сом анґлийски знал добре, тиж Лондон вельки технолоґийни центер, цо значи же дава велї можлївосци, а мам ту и родзинових хтори ми наисце вельо помогли. Прейґ братняка Владимира Сабадошового сом ше упознал и зоз його пайташами, а хтори часто приходзели до Нового Саду на „Еґзит”, та можем повесц же сом у Лондону уж мал досц добру екипу своїх людзох – почина о своїм професийним искустве наш собешеднїк.
Початки у явним сектору
По приходу до Лондону, шейсц мешаци робел у кол-центру за компанию хтора ше занїма зоз осиґураньом комбийох, а потим нашол роботу у фаху, як проєкт-менаджер. Роботу нашол у явним сектору, а достал и можлївосц едуковац ше на Универзитету Рогeмптон (University of Roehampton). Праве тот период визначує як барз значни за свойо професийне дозреванє.
– Пейц роки сом робел за покраїну Сари хтора налєгує на Лондон, и там ми було барз добре. Мал сом нагоду видзиц як то випатра робиц у єдней такей велькей системи у явней служби. Пред тим як сом там почал робиц, закончел сом єден професийни сертификат за проєкт менаджмент, а хтори ше углавним хаснує у явним сектору и дзекуюци хторому сом и достал роботу, вола ше ПРИНЦ 2 (PRINCE2). Док сом робел у явним сектору, мал сом можлївосц паралелно студирац и на Универзитету Рогeмптон, так же сом у тот час вельо робел на своїм усовершованю. Закончел сом и рижни сертификати за проєкт менаджмент, за дїловну анализу и ище вельо того. Тото цо ше ми окреме пачи у Анґлиї то тото же кед запошлюю роботнїка, патра виключно на знанє и компетенциї. Вельо им важнєйше хто кельо ма знаня и искуства, як хтори факултет закончел. Велї мойо пайташе хтори закончели, поведзме, природни науки, тераз су одлични инжинєре у єдних з найлєпших ИТ компанийох у Анґлиї – приповеда Иван визначуюци же Анґлийци любя робиц у державним сектору, бо веря же зоз тим доприноша своєй заєднїци, гоч плаци менши як у приватним сектору. Праве финансиї були причина прецо и наш собешеднїк, после пейцох рокох, пожадал направиц ище єден професийни крочай напредок.
Його шлїдуюци анґажман бул у приватним сектору, у америцкей компаниї „Кардлитикс” („Cardlytics”) хтора ше занїма зоз маркетинґом прейґ платних карточкох. Там препровадзел три роки дзе робел на рижних медзинародних проєктох, а потим кариєру предлужел у компаниї „Вайс” („Wise”) дзе є и нєшка заняти, а хтора роби прейґгранїчни трансфер пенєжох. Лондон му, як гвари, отворел дзвери огромного технолоґийного тарґовища и понукнул професийни можлївосци хтори чежко найсц у менших городох.
О Британцох лєм слова похвали
– Я мам барз позитивне искуство зоз людзми у Анґлиї. Лєгко з нїма постац приятель и вообще су нє жимни або нєдоступни як их часто представяю. Нє мал сом анї єдну ситуацию, чи зоз приятелями, чи у колективе, же сом ше нє уклопел. Ту ше барз почитує пристойносц, скромносц, цо мнє одвитує. Єст громаду успишних людзох, вельо маю пенєжи, алє звонка то нє так видно. Нєт того доказованя. Думам же зоз домашнїм воспитаньом яке ми Руснаци маме, же зме пристойни, вредни, културни…, таки прикмети ше ту максимално почитує – наглашує Иван.
Заш лєм, живот у Лондону ма и свойо нєдостатки. Найвекши проблем то високи цени нєрухомосцох, бранє хижох або квартельох под закуп, хтори представяю озбильне виволанє аж и за добре плацених локалцох. А кед слово о безпечносци, Иван дума же слика Лондону у явносци и на дружтвених мрежох часто викривена.
– Лондон ма 40 одсто людзох хтори родом нє отадз. То и єдна од його предносцох, бо кед ту придзеш, нє чувствуєш ше як странєц понеже кажде оддакадз. З другого боку, я нє чувствуєм же ситуация, цо ше безпечносци дотика, така алармантна як ше приказує на дружтвених мрежох. Лондон, з оглядом на свою велькосц и численосц жительства, єднак безпечни односно нєбезпечни як и други таки вельки городи. Анґлийци нє правя ґетои, алє будинки правя у гоч хторим сушедстве, так же нєт єдно место дзе концентровано населєна худоба. Дзеци хтори одрастаю у таких штредкох ше познєйше лєгчейше асимилую до дружтва, рошню вєдно з локалним жительством и маю векшу шансу висц зоз худобства. Юговосточна Анґлия, поведзме, найдрагша, та розлика медзи ценами хижох и плацох огромна. Людзе часто нє можу купиц квартель лєбо хижу ту дзе одросли, та ше прето одлуча виселїц. Окрем трошкох квартелїни и купованя квартелю, гевто друге нє таке барз страшне. Мож водзиц єден просекови, пристойни живот – заключує наш собешеднїк. Нєшка, после вецей як 10 рокох живота у тей британскей престолнїци, зоз богатим искуством и стабилну кариєру, Иван приклад як упартосц, порихтаносц на пременки и укладанє до знаня и едукациї можу отвориц дзвери аж и шветових метрополох.
Знанє и искуство треба дзелїц
Попри приятельствох хтори здобул у Анґлиї, Иван ше у Лондону часто стрета и зоз двоїма Руснацами, успишнима приятелями – Владимиром Сабадошом и Бояном Колошняйом, хтори там тиж вибудовали завидни кариєри у ИТ сектору. Вони троме часто чераю искуства о роботи у вельких технолоґийних компанийох, алє и о каждодньових виволаньох зоз живота у иножемстве.
– Зоз тих сходох и друженьох настала идея же бизме направели даяке здруженє Руснаци у технолоґиї и науки (РУТН), а зоз цильом же би ше Руснаци хтори робя у технолоґиї и науки повязовали, кед треба дакому помогнуц чи зоз совитом, чи розгварку. Здруженє би на даяки способ було и памятка на мойого шовґра Янка Сабадоша, хтори ше нажаль упокоєл пред пейцома роками, а хтори бул вершински програмер и ИТ фаховец и барз ми вельо помогнул знайсц ше у Анґлиї. Но, шицко то ище лєм идея, алє рахуєме же єдного дня можебуц прерошнє до дачого векшого – гвари на концу Иван, наздаваюци ше же би таке повязованє служело нє лєм поєдинцом, алє и цалей рускей заєднїци.