КОЦУР – У Подручней канцелариї Националного совиту рускей националней меншини у Коцуре штварток, 22. януара, означене Националне швето Руснацох.
Святочна програма облапяла бешеду, стихи и шпиванки на чесц рускей историї, култури и традициї, а почала зоз гимну Републики Сербиї Боже правди и шветочну шпиванку Браца Русини котри одшпивал Церковни хор Грекокатолїцкей церкви Успения Пресвятей Богородици под руководством дириґентскей палїчки Александра Планкоша.
Модератор вечара бул Микола Шанта, котри у першей часци програми пречитал текст о руснацтве, визначуюци значносц очуваня нашого язику, понеже, як гварел, то язик бешеди, алє и язик култури и традициї. Тиж ше огляднул на означованє 270 рокох образованя по руски у коцурскей школи и визначел його значносц за нашу заєднїцу. Як гварел, Дзень Руснацох то дзень одвичательносци же бизме нє забули своїх предкох, свой язик и свойо достоїнство.
Потим наступели школяре нїзших класох Катарина Бесерминї, Ана Тимко, Христина Шовлянски и Виктор Клашня котри з учительом Марком Буилом порихтали пригодни рецитациї наших поетох. Школярки висших класох Яну Тимко и Николину Копчански порихтала наставнїца руского язику Снежана Шанта. Вони пречитали текст о Руснацох и гуторели стихи познатих писньох.
Шицких привитал и повинчовал швето предсидатель Националного совиту Руснацох Стеван Самочета, а програма ше закончела зоз поему Лїтопис Михала Рамача чийо стихи гуторела Мария Горняк.
По законченю програми шицки присутни остали на друженю, зоз закуску и ошвиженьом, преславююци тот шветочни дзень за руски народ.
