Одбавени три стретнуца и зазначени два побиди

автор Д. Барна
421 Опатрене

КОЦУР – У своєй Розвойней лиґи, младши пионире Русина одбавели у Коцуре три фодбалски стретнуца процив екипи Коцура. Русиновци на двох стретнуцох були лєпши як їх парняки, а єдно стретнуце страцели.

На тим фодбалским змаганю наступели дзеци од 2011. року по 2016. рок.

Перше стретнуце бавела 3. класа основней школи, а бавело ше 6 + 1. Дзеци наступели у составе – Давид Колошняї, Тони Надь, Даниєл Фейди, Кристофер Дудаш, Йован Бошкович, Давид Гарди и Кристиян Чонка. Тото стретнуце страцели зоз 6:3. Ґоли дали Тони Надь (2) и Давид Гарди.

Потим бавела 5. и 6. класа, 2011. и 2012. рок, а тото стретнуце припадло русиновцом, понеже були кус лєпши як їх парняки зоз Коцура. У тим возросту наступели – Алекс Цвайґ, Никола Планчак, Марко Илич, Марко Драґутинович, Тони Орос, Лука Стойков, Тадей Виславски и Патрик Варґа. У тей екипи хибел лєм Єлисей Пап. Єдини ґол за Русин дал Никола Планчак.

Остатнє стретнуце одбавели дзеци 1. и 2. класи, 2015. и 2016. рок. Ту наймладши бавяче Русина зазначели прешвечлїву побиду зоз 3:0. У тим составе бавели – Марко Еделински, Лука Тасич, Дориян Попович, Михайло Шомодї, Стефан Такач, Страхиня Кршич, Тони Сивч, Андрей Надь и Филип Бурчан. Ґоли дали Лука Тасич, Тони Сивч и Андрей Надь.

На тих стретнуцох младих фодбалерох Русину предводзели тренере Зденко Шомодї и Денис Югик, котри заменьовал Деяна Йолича.

ПОВЯЗАНИ ТЕКСТИ