ШИД – У Руским доме вовторок, 28. юлия, отримана схадзка Управного одбору КПД Дюра Киш на хторей предсидатель Златко Манько поднєсол звит о отриманим фестивалє тамбурових оркестрох Мелодиї Руского двору.
Заключене же у орґанизацийним смислу фестивал бул добри, а тиж и по чишлє учашнїкох, та прилапени спомнути звит з акцентом же цо скорей треба започац пририхтованя за ювилейни 20. фестивал, хтори будзе 2027. року.
На схадзки тиж бешедоване и о пририхтованю шпивацкей ґрупи хтора ма наступиц на Фестивалє жридлового шпиваня Най ше нє забудзе у Дюрдьове 22. авґуста.
Досц слова було и о потримовки Дружтва Церковному одбору парохиї Преображеня Господнього же би ше зоз дописами компетентним институцийом, нє лєм до Општини Шид, вимагало врацанє вашарскей часци Кирбаю опрез церкви, дзе влонї першираз нє була, а локална власц вашарску часц премесцела на пажицу, хтора значно оддалєна од церкви.
Тиж потримана инициятива же би ше з нагоди Кирбаю у порти Лєтней владическей резиденциї 16. авґуста у пополадньових годзинох отримал Преображеньски базар на хторим би свойо продукти виложели рижни продукователє, а базар би мал буц як предложене и гуманитарного характеру.