ВЕРБАС – Скупштина општини Вербас зашедала вчера, 23. марца, кед отримана XX схадзка у актуалним зволаню.
Попри записнїка зоз предходней схадзки локалного парламенту, Скупштина општини Вербас принєсла Одлуку о приступаню виробку Стредньорочного плану општини Вербас за период 2023-2025. року, потим Одлуку о усвойованю Европскей повелї о родней ровноправносци на локалним уровню, и то єдногласно. У предлуженю принєшена и Одлука о анґажованю ревизора за окончованє екстерней ревизиї закончуюцого рахунку буджету општини Вербас за 2022. рок, як и одлуки о рочним ликвидацийним звиту, финансийним звиту за 2022. рок и о порушованю поступку ликвидациї Явного подприємства за будовательну жем, вибудов и драги „Дирекция за вибудов”.
Скупштинска векшина усвоєла информацию о ступню ускладзеносци планованих и реализованих активносцох з програми дїлованя явних подприємствох чий снователь Општина Вербас за период од 1. ануара 2022. по 31. децембер 2022. року, як и Анализу дїлованя явних подприємствох чий снователь Општина Вербас з превжатима мирами за одклоньованє поремеценьох у дїлованю за исти период.
Вименєни и дополнєни и одлуки о социялней защити гражданох општини Вербас, як и о снованю Културного центру Вербасу и Явней библиотеки „Данило Киш”.
Скупштина општини усвоєла звити о роботи и звити о финансийним дїлованю за 2022. рок Центра за социялну дїялносц општини Вербас, Явней библиотеки „Данило Киш”, Културного центру Вербасу, Центра за физичну културу „Драґо Йовович”, потим Апатикарскей установи Вербас, Служби звонкаинституцийналней социялней защити Ґеронтолоґийного центру Вербас, Туристичней орґанизациї општини Вербас и Явней аґенциї за зоогиґиєну и польопривреду општини Вербас.
Прилапени и ришеня з котрима дати согласносци на пременку статуту I, II и III месней заєднїци у Вербаше, як и месних заєднїцох у Бачким Добрим Полю, Змаєве, Коцуре, Савиним Селу и Равним Селу. Тиж, усвоєне Ришенє о претаргнуцу защити Памятнїка природи „Била тополя” у Савиним Селу, Рочни звит о роботи Општинского штабу за позарядово ситуациї општини Вербас за период од 1. януара 2022. по 31. децембер 2022. року, Оперативни план одбрани од вилїву за води II шора општини Вербас за 2023. рок, як и предклади Комисиї за кадрово, административни питаня и роботни одношеня.
Схадзка закончена з питанями и предкладами одборнїкох, пренєсол општински сайт.