РУСКИ КЕРЕСТУР – Перши Медзинародни екуменски фестивал духовней музики „Емаус Фестˮ отримани у Марийовим святилїщу Водица, всоботу, 13. мая зоз поладньовим обегованьом за мир, Екуменским форумом: Млади ше питаю и вечаршим концертом духовней музики „Емаус Фестˮ.
Обегованє за мир „Run4Unityˮ ше одвива по цалим швеце. Млади Руху фоколара задумали же би цали швет повязали зоз молитву за мир. Так ше каждого маю обегую за мир у швеце. Таке обегованє младих зоз Бечею, Молу, Падею, Горнього Брегу, Сенти, Беоґраду, та аж и зоз Македониї почало на базену, а закончело ше у Водици.
Интересантна културна, уметнїцка и духовна програма орґанизована за наймладших учашнїкох котри тиж участвоали и у обегованю за мир. Дзеци приказали свойо схопносци и интересованя през тоту програму, вєдно ше радовали и дружели.
Здруженє гражданох „Пакт Рутенорумˮ орґанизовало виставу уметнїцкей творчосци младих, на котрей ше млади на тему „Стретнуцеˮ виражели прейґ малюнкох, рисункох и фотоґрафийох котри були виложени у Водици, на крижох на котрих иншак виложени икони Крижней драги.
Павза за полудзенок и друженє шицких учашнїкох була нє лєм павза, алє и окремне друженє. Дзеци ше згваряли на розличних язикох, бавели фодбал, оганяли ше и їх дзвонки шмих одгуковал по Водици. Нє питал ше нїхто же хто тот, або гевтот, одкаль є. Змишали ше твари дзецох у заєднїцким бависку. Кус старши ше дружели зоз ґитару и шпиванку и так дзелєли радосц, заєднїцтво и любов.
По програми од 17 годзин започал Екуменски форум: Млади ше питаю. Волонтер каритасу Янко Катона привитал присутних на форуму: протоєрея ставрофора о. Бранка Чурчина котри на тото стретнуце пришол зоз благословом владики епископа бачкого Иринея, пастора Еванґелицкей словацкей Церкви о. Владимира Ловаса, иґумана кармелского манастира у Сомборе о. Стєпана Видака, пароха керестурского протоєрейя ставрофора о. Владислава Варґу, проф. економского факултета пана Домаґоя Сайтера зоз Осєку, виручителя у вецей штреднїх школох у Зомборе пана Марка Радаковича. Наратор форума була панї Сенжана Стойкович Павлович зоз министерства Правди и Управи за сотруднїцтво зоз Церквами и вирскима заєднїцами.
Млади, учашнїки „Емас Фестˮ форума поставели интересантни питаня на котри им госци одвитовали. Питаня були директни, млади ше нє ганьбели опитац ше тото цо их интересує и жадали же би ше им на тото щиро одвитовало.
На концу форума, мож повесц же заєднїцке заключенє нє патриц тельо на розлики, на тото цо нас дзелї, алє най би кажди поєдинєц жил по Евангелиї, жил по Слове Божим. Як на концу Сежана Стойкович Павлович и гварела же найзначнейши Божо заповиди то любиц Бога и любиц ближнього свойого. И кед тото маме, шицко маме цо потребне.
