ВЕРБАС – У Подобовей ґалериї Културного центру Вербас пияток, 20. октобра, на Дзень општини и Дзень ошлєбодзеня Вербасу, отворени Єшеньски подобови салон котри традицийно орґанизує Здруженє подобових уметнїкох Вербасу (УЛУВ).
Того року, у конкуренциї од 45 авторох, нащивителє видзели 21 уметнїцку роботу, котри вибрала селекторка историчарка уметносци з Беоґраду Соня Белїч.
Присутних того вечера привитали заменїца предсидателя општини Вербас Тияна Алексич, руководитель Подобовей ґалериї Културного центру Вербас др Силвиа Єлачич, подпредсидателька УЛУВ Марияна Поптешин Петричевич, а тогорочна селекторка Соня Белїч представела виставу и дїла у єй рамикох, а потим преглашела и побиднїкох.
Главну награду тогорочного Єшеньского салону достала Юлия Юка Дьокич за слику „Милош и Жучо”, награду за рисунок „Безчежински стан” достала Луна Йованович, а награду за скулптуру „Лов” достал Милорад Правуляц.
На вистави, медзи 21 найлєпшим дїлом вибраним у рамикох Єшеньского салону и дїла уметнїкох зоз Коцура – „Риби хватачки” Силвестера Макая у комбинованей технїки, и „Ткань” Ромка Макая, акрил.
Окрем спомнутих, на вистави у вербаскей Ґалериї виложени и „Долїна орґонох” Мариї Николич, „Остатнє бависко” Радомира Ґлушца, „Депония” Светислава Лудошкого, „Поза кулисох” Бориса Биленькия, „Молговини” Милици Фемич, „Одраженє” Тамари Барановски, „Портрет” Светислава Шлюкича, „Джонсонова крижна драга” Снежани Давидович, „Грай то ознова Сем” Михайла Войновича, „Пейзаж” Миленка Буиши, „Композиция за Салон” Драґана Бабовича, „Елеґантна” Бориса Барановского, „Базен” Петра Шушулича, „Ошвит” Владимира Степанова, скулптури „Горкосц” Новака Нови Йововича и „Heppiness” Блаґоя Орбовича.
Любителє подобовей уметносци можу нащивиц виставу Єшеньского подобового салону УЛУВ у Подобовей ґалериї Културного центру Вербасу по 1. новембер.
