НОВИ САД – Пияток, 13. децембра у Городскей концертней сали Спортске дружтво Партизан 2 – Танєчни клуб (П2) отримало традицийни Новорочни танєчни концерт.
На вечаре танца, зоз веселим репертоаром на хторим було 22 точки, наступели шицки возрости клуба: предшколски, дзецински, юниорски и сениориски.
Добре увежбани танєчнїци ше зменьовали на бини у веселих и интересантних костимох, аж и на тварох виражовали дух музики на хтору ше рушали, а у каждей точки указали ґрациозносц рухох и єдинство ґрупи.
Танєчни ґрупи зоз П2 вше були дзечнє и весело прилапени кед наступали на нашим Фестивалу дзецинскей творчосци Руснацох у Войводини „Веселинка”. Вецейрочна танєчнїца Дина Мудрох у П2 тераз нє лєм тренер, алє ше на концерту указало и же є схопна хореоґрафка, а виведзени вецей танци хтори порихтала, як танєчнїци тиж зме препознали Кристину Ковач, Елену Деметер, Веру Хромиш и наймладшу медзи нїма Алиону Корпаш, хтори порядни и на годзинох руского язика у Новим Садзе.
