РУСКИ КЕРЕСТУР – Стреду, 9. септембра у Народней библиотеки у Замку означени 150 роки од снованя першей читальнї у Руским Керестуре.
Округли стол, хтори бул пошвецени праве тей значней рочнїци орґанизовало Дружтво за руски язик, литературу и културу и керестурске оддзелєнє Народней библиотеки Кула.
На сходзе бешедоване о историї снованя першей читальнї, о єй сновательох и о улоги читальнї у културним и дружтвеним живоце Руснацох. То значни датум за Руснацох, прешлого року означени 200 роки библиотеки Матици сербскей, читальнї по сербски, а ми Руснаци ше можеме цешиц же означуєме 150 роки читальнї у Руским Керестуре.
Дзень 9. септембер, бул пошвецени Феркови Пап-Радваньови хтори вєдно зоз учительом Михайлом Джуньом бул єден зоз сновательох. На Округлим столє реферат о историї читальнї пречитала Ирина Папуґа зоз Дружтва за руски язик, литературу и културу.
На сходзе була библиотекарка Ґабриєла Саянкович. представителька Националного совиту Руснацох Таня Арва Планчак, любителє писаного слова, алє и потомки Ферка Пап-Радваня Ксения Варґа и Андреа Медєши, хтори ше здогадли на приповедки о свойому пра и чукун дїдови, и на вредносци образованя хтори остали у фамелиї.
Як наявене на округлим столє, Народна библиотека Кула 150-рочнїцу од снованя читальнї у Керестуре означи 14. децембра, кед ше означує дзень библиотекарох.
