КУЛА/КРУЩИЧ – У храме св. Йосафата Кулскей парохиї, як и у єй филияли у Крущичу 19. януара означене швето Богоявленя Господнього.
У Кулскей парохиї Службу Божу служел о. Платон Салак, ЧСВВ, на 9 годзин, а после Служби пошвецел воду. После того чину пошвецел обисца парохиянох у єдней улїчки. Пошвецанє будзе предлужене и идуцих дньох.
У Крущичу, кулски парох о. Дамян Кича, ЧСВВ, на 10:30 годзин служел Службу Божу, после котрей пошвецел воду и такой потим и обисца.
Як визначел о. Кича, Богоявленє у часох перших християнох було векше швето як Рождество, бо ше на тото швето по першираз обявює Пресвята Тройца. У молитвох котри ше чита, у моменту пошвецаня води, модлї ше Господа же би на каждого хто з тей води будзе пиц лєбо з ню пошвецац людзох и предмети, зишла Божа благодать и шицки потребни ласки.
