НОВИ САД – У шедзиску Завода за културу войводянских Руснацох (ЗКВР) вчера, 26. авґуста отримана схадзка пейцчленей Комисиї за оценьованє приявох хтори сцигли на порядни рочни конкурс Заводу за софинансованє програмох и проєктох очуваня, пестованя, презентациї и розвою култури и уметносци рускей заєднїци у Републики Сербиї.
Буджет Конкурса 1,8 милиони динари, од хторих милион наменєни за проєкти з обласци пестованя традицийней култури, а остаток за проєкти з сучасней уметнїцкей творчосци.
Начално, на конкурс придати 13 проєкти з облаци традицийней култури и осем проєкти з обласци сучаней творчосци, на вкупну суму 4,97 милиони динари. У медзичаше, два апликациї поцагнути, док єдну Комисия одбила пре зраженє интересу.
По конєчним предкладу Комисиї, предложене же би Завод у тим року софинансовал 10 проєкти з обласци традицийней култури, а хтори придали РКЦ Нови Сад, Грекокатолїцка парохия Петра и Павла з Нового Саду, КПД Карпати Вербас, КПД Дюра Киш Шид, КУД Петро Кузмяк Нове Орахово, Здруженє женох Олория Дюрдьов, Союз Русинох Українцох Нови Сад, КУД Тарас Шевченко Дюрдьов, РКУД Гавриїл Костелнїк Кула и КУД Жатва Коцур.
Тиж, предложене же би ше софинансовали и осем проєкти з обласци сучасней творчосци хтори придали Музика Рутеника з Руского Керестура, РКЦ Нови Сад, КПД ДОК Нови Сад, Дом Култури Руски Керестур, Руска матка Руски Керестур, Матка – Дружтво Руснацох Нового Саду – Войводини, РНТ Петро Ризнич Дядя Руски Керестур и КУД Тарас Шевченко Дюрдьов.
Попри предкладу виносох з хторима би требало софинансовац начишлєни проєкти, Управному одбору ЗКВР тиж предложене же би часц буджету наменєного за сучасну творчосц того року пренаменєл за додатне софинансованє проєктох традицийней култури.
Схадзка УО ЗКВР на хторей би требали буц утвердзени конєчни резултати конкурсу и додзелєни суми будзе отримана початком шлїдуюцого тижня
