РУСКИ КЕРЕСТУР – Фодбалере Русина, вчера 12. фебруара одбавели ище єдно приятельске стретнуце процив екипи БСК зоз Бачкого Ґрачцу, хтору надвладали з резултатом 3:0 (1:0).
Єдну од акцийох Русина започал Кулич. Кулич додава лабду Саянковичови хтори зоз правого боку уходзи до 16 метерох, валя го бавяч хтори го провадзи и то бул пенал за Русин. Сиґурни реализатор зоз 11 метерох бул Филип Вуйович.
Други ґол за Русин дава їх помоцнєнє у жимскей часци, Никола Циврич, хтори одлично скака и преруцує лабду понад ґолмана, но лабда ше одбива лєм до стативи, на хтору по други раз реаґує и дава свой перши ґол за Русин, а други на нєдзельовим стретнуцу.
Єден спомедзи найлепших младих фодблерох Младежскей лиґи, Лука Иличич, зоз правого боку уходзи до 16 метерох, преходзи свойого чувара, на ньго виходзи и ґолман, но и його Иличич намудрує и дава треци ґол за Русин.
Такой на стреду, 15. фебруара Русин на своїм терену отрима ище єдно приятельске стретнуце процив екипи Омладинац зоз Дироню.
