НОВИ САД – Пре историйно нїзки водостой Дунаю преглашена позарядова ситуация на територийох Зомбор, Кула и Вербас, сообщене зоз Покраїнскей влади.
Покраїнска влада, вчера, 29. юлия на предклад Покраїнского штабу за позарядово ситуациї, видвоєла 270 милиона динари за запровадзованє швидких мирох и роботох на обезпечованю функционалносци Гидросистеми Дунай–Тиса–Дунай, а пре историйно нїзки водостай Дунаю и барз нєвигодну гидролоґийну ситуацию преглашела позарядову ситуацию на територийох городу Зомбор и општинох Кула и Вербас, сообщела Покраїнска влада.
На позарядовей схадзки Покраїнского штабу за позарядово ситуациї, на хторей предшедовала предсидателька Покраїнскей влади Мая Ґойкович, хтора и на чолє Штабу, розпатрана актуална гидролоґийна ситуация, як и мири за ублажованє єй пошлїдкох и обезпечованє нормалного функционованя системи у наиходзацим периодзе.
У сообщеню же вчера зазначени историйни минимум водостою на Дунаю од минус 127 центи, цо барз озбильне виволанє за функционованє Гидросистеми Дунай–Тиса–Дунай, за системи за наводньованє, польопривредну продукцию и за других хасновательох. Прето Покраїнски штаб за позарядово ситуациї предложел Покраїнскей влади же би преглашела позарядову ситуацию пре преберанє мирох за зоперанє и одклоньованє пошлїдкох критичней ситуациї.
Обезпечени средства буду унапрямени до ЯВП Води Войводини, хторе у предходним периодзе превжало шицки розположиви мири же би ше ублажело уплїв окреме нїзкого водостою, а активносци ше предлужує у складзе зоз гидролоґийнима условиями у тей хвильки.
Заключене же Покраїнски штаб за позарядово ситуациї предлужи провадзиц стан на териториї АП Войводини и же у складзе зоз своїма компетенциями, будзе координовац зоз активносцами шицких компетентних институцийох же би ше ублажело пошлїдки пре насталу ситуацию, гвари ше у сообщеню.
