РУСКИ КЕРЕСТУР – У рамикох „Erasmus plus” проєкту, ґрупа просвитних роботнїкох зоз керестурскей школи „Петро Кузмяк” нєдавно участвовала у проєкту „Let’s party” хтори ше реализує у Словацкей, у Старей Тури.
Нащива отримана у периодзе од 18. по 21. юлий, та з тей нагоди просвитни роботнїки – Ясмина Надь, Валентина Русковски, Деян Бучко, Тамара Будински, Славко Чапко и директорка спомнутей школи Наталия Будински нащивели и општину Стара Тура дзе мали нагоду бешедовац зоз приматором того словацкого места, Леополдом Барчом. Окрем Керестурцох, учасц у проєкту мали и учашнїки зоз Ческей.
Як на тот завод визначела директорка школи Наталия Будиснки, проєкт „Let’s party” одлична нагода за нове усовершованє з обласци партитивних проєктох хтори ше реализує през колаборацийни активносци поєдинцох и заєднїцох, алє и нагода же би ше представело руску културу, язик и образованє колеґом зоз Словацкей и Ческей. Роботнї ше одношели на креированє проєктох хтори иницираю млади, а хтори доприноша ришованю проблемох локалней заєднїци.
Представнїки керестурскей школи, медзи иншим, представели активносци хтори ше реализує у Керестуре, док у рамикох розваги орґанизовали и успишну роботню ученя руского язика и историї.
