ШИД – Бояна Йованович, бициґлистка Бициґлистичного клуба „Шид“ найлєпша спортистка у катеґориї сениоркох за прешли рок, а Лазар Данґузов столнотенисер, преглашени за найлєпшого спортисту сениора за прешли рок.
На шветочносци хтора вчера отримана у сали Културно-образовного центра у орґанизациї Спортского союзу општини и Општини Шид преглашени найлєпши спортисти и спортски екипи за 2022. рок.
Награди додзелєни у 12 катеґорийох, а награду за животне дїло достал новинар у пензиї Петар Веїнович хтори вецей як 50 роки провадзи спорт як новинар Радио Шиду потим РТВ „Коперникус“ алє и других медийох.
Награди придавали предсидатель СО Шид Тихомир Стаменкович, хтори шицким винчовал на припознаньох и пожадал нови припознаня як и Ясмина Юрас, предсидателька Спортского союзу Войводини.
