РУСКИ КЕРЕСТУР – Фодбалере Русину младшей катеґориї предлужую стретнуца у своєй Розвойней лиґи, та всоботу, 29. априла бавели процив екипи з Червинки, а процив хторей однєсли два побиди, єдно пораженє и єдно стретнуце одбавели нєришено.
На керестурским Ярашу по красней хвилї наступели дзеци возросту од 1. по 6. класу основней школи хтори були подзелєни до штирох екипох.
Найстарша екипа Русину, односно дзеци 4, 5. и 6. класи, одбавела потераз свойо найуспишнєйше стретнуце у тим року, з оглядом же победзели реномираного процивнїка зоз Червинки, з резултатом 5:0.
Найрозположенши бавяче хтори дали аж по два ґоли були Марко Илич и Никола Планчак, а ту и Тони Орос зоз датим єдним ґолом. За тоту екипу наступели – Алекс Цвайґ, Никола Планчак, Марко Илич, Єлисей Пап, Тони Орос, Тадей Виславски, Патрик Варґа, Андрей Виславски, Алексей Виславски, Ален Бики, Дарко Еделински и Ерик Русковски.
За кус младши состав, дзеци 3. и 4. класи, наступели – Йован Цвєтичанин, Николина Гарди, Дарко Еделински, Стивен Банич, Давид Гарди, Йован Бошкович, Даниєл Фейди, Тони Надь Пикси и Давид Колошняї. Русиновци у тим составе процив Червинки одбавели з нєришеним резултатом 2:2. Ґоли дали Давид Гарди и Дарко Еделински.
На меншим терену, наступели и дзеци 2. и 3. класи, хтори Червинку победзели зоз 4:2, а два ґоли за Русин дал Тони Надь, док по єден ґол дали Тони Сивч и Давид Гарди. Окрем нїх, за Русин наступели и – Давид Еделински, Лука Залич, Андрей Надь, Иван Надь, Страхиня Кршич, Кристиян Чонка и Кристофер Дудаш.
Наймладши русиновци, дзеци 1. и 2. класи, бавели тиж на меншим терену, а од Червинчаньох страцели зоз 9:3. Два ґоли за свой тим дал Лука Тасич и єден дал Тони Сивч. У тим составе наступели и – Марко Еделински, Михайло Шомодї, Алек Малацко, Дориян Попович, Стефан Такач и Филип Бурчан.
На стретнуцу, по два змаганя судзел предсидатель Клубу, Тихомир Медич, як и тренер ґолманох у младших катеґорийох Мирослав Накич.
