НОВИ САД – Управни одбор (УО) НВУ „Руске слово” на схадзки отриманей 16. юлия, принєсол одлуку о розписованю Явней оглашки за вибор директора НВУ „Руске слово”, хтора отворена од нєшка, 24. юлия, а обявена є у новинох ч. 30 (з датумом друкованя 24. юлий 2026. рок), и на сайту Установи. Директора ше вибера на штири роки.
Попри общих условийох яки предписани зоз Законом о роботи, кандидат за директора треба же би сполнєл и шлїдуюци окремни условия – же би мал закончену високу фахову приготовку (VII ступень), найменєй три роки роботного искуства у обласци информованя, лєбо на роботох руководзеня и знанє руского язика.
О шицких условийох и потребней документациї мож ше информовац у новинох ч. 30 и на сайту Установи на тим линку – текст Явней оглашки и формулар вияви, а заинтересовани кандидати треба же би послали свою прияву УО на адресу НВУ „Руске слово”, Булевар ошлєбодзеня 81/ VII, 21 000 Нови Сад, з надпомнуцом „За Явну оглашку за директора НВУ „Руске слово”. Конкурс отворени 15 днї.