РУСКИ КЕРЕСТУР – Зоз виставу малюнкох зоз тогорочней VII Подобовей колониї „Еуфемия Гарди” и Поетско-музичним вечаром пошвеценим Юлиянови Надьови, Руска матка, вчера, 28. децембра у Доме култури шветочно преславела 35. рочнїцу од єй снованя.
Окрем єй членох, на означованю ювилея присуствовали и подпредсидатель Покраїнскей влади Томислав Жиґманов, предсидатель Националного совиту Руснацох Стеван Самочета и секретар Месней заєднїци Михайло Пашо.
Преслава почала у Спортскей гали зоз отвераньом вистави малюнкох зоз тогорочней Подобовей колониї „Еуфемия Гарди”, хтора отримана у октобру у Руским Керестуре.
Нащивительох на отвераню кратко привитали предсидатель Рускей матки проф. др Михайло Фейса, и спред керестурского Месного одбору РМ – проф. Славко Пап и Дюра Папуґа. На вистави були виложени 16 роботи подобових творительох Рускей матки, векшина з Руского Керестура, алє и других местох.
Потим ше прешло до просторийох Дома култури дзе отримане 10. Стретнуце поетох, литературних и музичних творительох Рускей матки.
Пред тим як почала шветочна програма, ювилейну преславу повинчовали – предсидатель Националного совиту Руснацох, Стеван Самочета, хтори визначел доприношеня Рускей матки кед слово о очуваню руского националного идентитету, а пригодни слова виповед и подпредсидатель Покраїнскей влади Томислав Жиґманов, хтори, медзи иншим, визначел же кед слово о култури, Руснаци би ше требали окреме пишиц, понеже спадаю до заєднїци хтора ма найвекше число образованих людзох и хтора дзба о своєй култури. О успишно реализованих проєктох Рускей матки, бешедовал єй предсидатель, проф. др Михайло Фейса.
После пригодних словох, уручени награди за поезию и, першираз того року, за прозу. Припознанє з меном „Юлияна Надя” за 2025. рок, за обявену поезию на руским язику достала др. Ваня Дудаш зоз Нового Саду, док за поезию на сербским язику достал Бранислав Свркота зоз Червинки. Кед слово о припознаню з меном „Мирослава Силадїяˮ за литературни роботи на руским язику достал дипл. инж. Михайло Катона з Руского Керестура. Лауреатох предкладали члени двох Здруженьох – Рускей Матки и Задужбини „Бори Латиновичаˮ зоз Кули.
Потим ше зоз своїма поетскима творами представели присутни 11 члени Рускей матки и члени Задужбини „Бори Латиновичаˮ, та програма була двоязична.
За музични сеґмент задлужени бул бенд „Пуна чаша…ˮ, односно присутни гудаци – Микола Стрибер, Любомир Загорянски и Мирон Сивч.
