РУСКИ КЕРЕСТУР – После ускладзованя терминох и пременки фокуса зоз тима хторим наменєни проєкт Театер на дланї на хтори Руски народни театер (РНТ) Петро Ризнич Дядя конкуровал за средства до Буджетского фонску Министерства за людски и меншински права и дружтвени диялоґ, всоботу 17. мая почали театрални роботнї за дзеци.
После одобрених средствох, концом януара направена явна поволанка прейґ Рутенпресу и циркуларного писма шицким културно-уметнїцким дружтвом (КУД) же би ше приявели на тоти роботнї, одволанє було барз слабе, та лєм зоз Руского културного центру з Нового Саду ше явел директор и гварел яка ситуация, а зоз других КУД нїхто, анї нє одвитовал на циркуларне писмо. То пременєло концепцию того цо ше ма робиц.
Зоз догварку предвидзене же би ше отримало три роботнї 17. 25. и 31. мая, та ше на першей, хтора отримана всоботу, 17. мая розрабяло основи сценскей бешеди и артикулация гласох на сцени. На другей роботнї тема будзе основа театраней експресиї – виражованє емоцийох на сцени, а на трецей основи сценского руху. То ше муши звладац хто сце войсц до татралного живота, а як визначел директор Орос можебудз на єшень РНТ предлужи тоти роботнї зоз другима ґенерациями.
Тот проєкт вифинансовал Буджетски фонд хтори розписує Министерство за людски и меншински права и дружтвени диялоґ и Национални совит рускей националней меншини.
На першей роботнї едукаторе були Александра Деянович, Мирослав Малацко и Ребека Планчак, на другей буду Адриана Надь Барна, Мая Зазуляк Гарди и Ребека Планчак, а на трецей Янко Лендєр, Мирослав Малацко и Ребека Планчак.
