РУСКИ КЕРЕСТУР – Младши катеґориї ФК „Русин” всоботу 12. октобра одбавели 4. коло розвойней лиґи процив екипи ФК „Сутєска” зоз Бачкого Доброго Поля, дзе на Ярашу одбавели штири стретнуца. Требало бавиц и процив екипи ЦФК зоз Вербасу, медзитим госци ше пре приватни причини нє зявели.
Младши катеґориї Русина всоботу були менєй успишни як прешлого викенду, понеже од штирох одбавених стретнуцох зазначели єдну побиду и три пораженя.
Резултати були шлздуюци:
Дзеци зоз 2. класи зазначели пораженє зоз резултатом 2:5, медзитим треба надпомнуц же дзеци зоз Керестура бавели процив дзецох зоз 3. класи. Дзеци 3. класи зазначели прешвечлїву побиду зоз резултатом 21:3. Млади фодбалере 4. класи зазначели пораженє зоз резултатом 2:4, док дзеци зоз 5. класи тиж зазначели пораженє зоз резултатом 2:6.
Дзеци предшколского возросту и дзеци зоз 1. класи нє бавели свойо стретнуца, понеже ше пре приватни причини екипа ЦФК зоз Вербасу нє зявела.
Шлїдуюце 5. коло розвойней лиґи екипа Русина будзе бавиц на соботу 19. октобра у Равним Селу процив екипи ФК „Пролетер”.
