РУСКИ КЕРЕСТУР – Пионире Фодбалского клубу „Русинˮ, у своєй Розвойней лиґи, стреду 27. децембра, у Спортскей гали у Руским Керестуре, одбавели три приятельски стретнуца процив ФК „Оджакˮ, и у шицких трох зазначели побиду.
Скорей главних стретнуцох, перше наступели дзивчата мишаного возросту, од 3. по 5. класу основней школи, а у составе – Зара Малацко, Елена Ґолубович, Николина Гарди, Милена Рамач и Адрияна Штранґар.
Дзивчата наступели процив Русинових хлапцох зоз 3. класи, та з тей нагоди одбавели нєришено 2:2, алє после пеналох, дзивчата однєсли побиду зоз резултатом 4:3.
Потим наступели хлапци 3. класи, у составе – Страхиня Кршич, Тони Сивч, Лука Зелич, Филип Бурчак, Андрей Надь, Алек Малацко, Славиша Свирчев и Алекса Медєши, а за Русин наступел и Еван Медєши з Нового Саду.
Русиновци своїх парнякох з Оджаку победзели зоз резултатом 3:2, а ґоли за свою екипу дали – Еван Медєши (2) и Тони Сивч (1).
Шлїдуюци наступели дзеци 4. класи, у составе – Кристофер Дудаш, Иван Надь, Давид Гарди, Давид Колошняї, Даниел Фейди, Кристиян Чонка, Тони Надь и Виктор Надь, а дзекуюци ґолом Давида Гардия и Тония Надя, и у тим стретнуцу русиновци зазначели побиду з резултатом 2:1.
Найстарши русиновци, дзеци 5. класи, тиж однєсли побиду, з прешвечлївим резултатом 7:2, а дзекуюци ґолом Андрея Виславския и Алекси Цвайґа, хтори дали аж по три ґоли, док єден ґол дал и Дарко Еделински. У тим составе наступели и – Алексей Виславски, Дарко Еделински, Ален Бики, Йован Цвєтичанин, Стефан Арва, Мартин Пашо, Стефан Ковачевич и Теодор Гарвильчак.
Тренер Русиновим бавячом Зденко Шомодї, а шицки три стретнуца судзел ветеран Фодбалского клубу „Русинˮ, Денис Югик.
За соботу, 30. децембра, у Спортскей гали, плановане отримац шейсц стретнуца Русинових когуцикох и пионирох, а процив екипи „Душан Силниˮ з Вербасу.