КОЦУР – У Римокатолїцкей церкви Шицки святи у Коцуре, вчера, 1. новембра, означени Кирбай, швето Шицких святих по григориянским календаре. Велї парохиянє того святочного дня нащивели римокатолїцку церкву и присуствовали на Служби Божей.
Кирбайска Служба Божа почала на 11 годзин, служел ю парох и декан о. Тибор Жунї зоз Србобрану, а сослужели домашнї управитель о. Карло Сабадї котри бул и казательнїк, о. Дєрдь Югас зоз Кули и декан бачки и парох коцурски о. Владислав Рац. У казанї о. Сабадї визначел же тот дзень преслава шицких наших надїйох, наших молбох и крочайох. Наша церква, наша драга, поволанка на шветлосц, най нас змоцнї и водзи до вичного блаженства, додал домашнї парох з тей нагоди, а най нас водзи през цали час и благослови тих котри знаю заплакац з тима котри плачу, шмеяц ше з тима котри ше шмею и буц ту и остац кед то потребне, визначел на концу.
Святочносц того швета возвелїчана зоз молитву и шпивом присутних вирних, у провадзеню орґульох. Служба Божа служена на мадярским и горватским язику, як то и обичай у коцурскей римокатолїцкей церкви.
Парохиянє и того року на швето Шицких святих на гробох своїх милих покойних, на шицких валалских теметовох, палєли швички. Понеже тот обичай превжали шицки валалчанє, окрем вирних римокатолїкох, швички палєли и вирни на гробох покойних на грекокатолїцким и православним теметове.
Нєшка на 9 годзин рано на римокатолїцким теметове будзе Служба Божа за шицких котри вецей нє з нами, а потим буду пошвецени гроби покойних.
