Нєшка у Свиднїку почина 69. Швето русинско-українскей култури

автор В. Паплацко
469 Опатрене

СВИДНЇК/ПРЕШОВ (СЛОВАЦКА) – Зоз културнима активносцами, писню и танцом, нєшка у Свиднїку почнє найвекше швето култури Русинох-Українцох Републики Словацкей. Фестивал того року будзе тирвац три днї, перши дзень у Свиднїку, а всоботу и внєдзелю у Прешовским амфитеатре.

Традицийно, манифестация почнє з „Бешеду з українскима писателями” у Поддуклянскей библиотеки, потим шлїдзи отверанє Вистави уметнїцких роботох у Музею українскей култури, а пополадню у просторе свиднїцкого Сканзену отрима ше фолклорно-етноґрафична програма „Скарби народу”.

На фестивалу буду участвовац найлєпши представителє писнї и танцу зоз Словацкей. То буду Поддуклянски народни ансамбл (ПУЛЬС), ансамбли Земплин, Карпатянин, Шаришан, шпивачки Мария Мачошкова и Ана Порачова, як и други.

Тиж так наступя госци зоз України, Польскей и Сербиї. Сербию будзе представяц Українске културно-уметнїцке дружтво „Калина” зоз Индїї.

Треба повесц же одход ансамбла зоз Индїї оможлївел Союз Руснацох Українцох Сербиї хтори достал поволанку од свойого партнера зоз Словацкей, Союзу Русинох-Українцох Словацкей, хтори и орґанизатор того найстаршого фестивалу Русинох и Українцох у Европскей Униї.

Того року фестивал будзе першираз орґанизовани у двох местох – Свиднїку и Прешове.

ПОВЯЗАНИ ТЕКСТИ