РУСКИ КЕРЕСТУР – Будовательни инспектор Миладин Пикула спред Општинскей управи, Оддзелєня за инспекцийни роботи, тих дньох дал дошлєбодзенє за хаснованє Велькей сали и бини Дома култури у Руским Керестуре.
Здогаднїме, Велька сала и бина у Доме култури заварта за хаснованє од авґуста 2024. року пре нєбезпечносц. Закрице над тоту часцу будинка премакало, обачене було же ше улєгнул падлаш дзе ношаца греда, очкодована була и часц древеней конструкциї закрица, черепи, алє и нукашньосц обєкту.
Роботи на санациї тирвали од октобра 2025. року, а по законченю роботох и оконченим инспекцийним надпатрунку, утвердзене же тераз сполнєти шицки условия же би ше тоту часц обєкту ознова хасновало, односно же би ше предлужело отримовац културни активносци у Вельей сали и на бини.
Средства за санацию обезпечела Општина Кула, хтора и снователь будинку, а роботи окончовало подприємство „МАКО МИЛ ДООˮ, чий власнїк Синиша Ковачевич з Руского Керестура.
Директор Дома култури на тот завод наявел же шлїдуюци крочай будзе реконструкция и других часцох закрица Дома култури.
