ВУКОВАР (ГОРВАТСКА) – Стреду, 18. децембра у Городскей библиотеки на оддзелєню за младих „Спаялица”отворена пията ювилейна Вистава народного облєчива меншинох Вуковарско-сримскей жупаниї (ВСЖ).
Присутних привитала предсидателька Союзу Руснацох Републики Горватскей Дубравка Рашлянин котра наглашела же народне облєчиво вше було символ идентитету одредзеней националней заєднїци, а попри того з нїм ше указовало статус и положенє. Потим привитала госцох – члена Совиту за национални меншини Републики Горватскей Звонка Костелника, представнїцу городу Кристину Божич Иванович и представнїка Управного оддзелєня за туризем и културу ВСЖ Марка Вуколича, котри отворел виставу.
После поздравних словох ушлїдзело презентованє народного облєчива, а на вистави участвовали представнїки албанскей, нємецкей и українскей националней меншини ВСЖ як и Ради бошняцкей, мадярскей, рускей, словацкей и сербскей националней меншини ВСЖ. Присутни дознали вецей о традициї облєканя каждей националней меншини, з якого материялу направени облєчива, у яких нагодох ше их ношело и подобне.
Вистава будзе отворена по 8. януар 2025. року.
Орґанизатор вистави Союз Руснацох РГ и Рада рускей националней меншини ВСЖ, а под покровительством Совиту за национални меншини РГ и Городскей библиотеки Вуковар.
