РУСКИ КЕРЕСТУР – Моцна буря вчера залапела векшу часц Войводини, та медзи потрафенима местами бул и Руски Керестур.
Кус после 14 годзин шиви хмари прекрили Керестур, а моцни витор дзвигал прах и ламал конари.
Поваляни древа єст на вецей местох у валалє, даґдзе очкодовани и закрица на хижох, а найбаржей страдали стари древа на керестурскей парохиї.
Яка чкода направена написане на Фейсбук боку церкви, дзe мож пречитац же вивалєни два вельки ядловци на парохиї, поламани древа у порти, а найвекша чкода коло турнї дзе зруцени даскельо квадрати бакарних плочох. Прето, од Маковского шору, єдна часц порти оградзена пре безпечносц. Як далєй визначене, же би пре можлїви диждж у наиходзацих дньох нє пришло до ище векших чкодох, будзе ше патриц же би ше чкоду од витру санировало цо скорей.
Попри пошлїдкох моцного витру, буря векшей часци Войводини заш лєм принєсла и дижджу, но Керестур и з тей нагоди остал сухи.
