КОЦУР – Школяре Основней школи „Братство єдинство” у Коцуре вовторок, 27. януара, з нагоди означованя школскей слави Святи Сава у Велькей сали Дома култури отримали пригодну програму.
За тоту нагоду вредни школяре зоз своїма учительками, учителями и наставнїцами пририхтали числени точки з котрима возвелїчали живот святого Сави. Програма почала зоз гимну котру му одшпивал школски хор, а потим шлїдзели и привитни слова.
Шоровали ше числени рецитациї и бешеди школярох, драмски слички, а наймладши одшпивали и вецей шпиванки котри пририхтали. Вкупну програму прикрашел и танєц наймладших фолклорашох зоз валалского КУД „Завичайне врело”.
Богата програма за тото швето була нагода же би ше и числена публика здогадла на вредносци котри нам на чуванє охабел тот перши сербски архиепископ, просвититель и творитель законодавства. Святого Саву ше трима за зачатнїка сербскей стредньовиковней литератури и защитнїка просвитних установох, та през числени точки визначена була и його улога у розвою школства и образованя у Сербиї.
Кажда точка вредних школярох котру пририхтали за школску славу була наградзена зоз гласним аплаузом присутней публики, поцешених родичох, бабох, дїдох и блїзших.
