РУСКИ КЕРЕСТУР – У гуманитарней акциї за пейцчлену фамелию Козицкий з Руского Керестура од конца авґуста назберане вкупно 46.280 динари, а тераз порушана акция за Планчакових.
За фамелию Козицкий – Екатерину, Александра и їх троїх дзецох, иншак русиянских державянох, стреду 28. януара, закончена гуманитарна акция хтора порушана концом авґуста прешлого року. Теди ше пенєж могло донирац на даскелїх местох у валалє, та од теди назберане вкупно 46.280 динари.
Пенєжи фамелиї дати на два заводи. Єдна часц, 18.000 динари, им однєшна штредком децембра, кед Екатерина по други раз закончела у шпиталю у Вербаше, та єй требало пенєжи за трошки лїченя. Друга часц, 28.280 динари фамелиї Козицкий однєйшени стреду, 28. януара.
Фамелиї з Русиї потераз помогли числени людзе з валалу и волонтере Каритасу хтори им углавним ношели поживово продукти або пенєжи. Од велькей помоци були и члени Добродзечного огньогасного дружтва, даскелї приватни поднїмателє, а ту и Здруженє гражданох „Пакт Рутенорумˮ хтори зберали средства на велїх збуваньох хтори орґанизовали.
По законченю гуманитарней акциї за фамелию Козицкий, почало ше зберац пенєж за оправку закрица на хижи, хторе Планчаковей фамелиї нєдавно згорело.
Акция порушана зоз цильом же би ше виплацело напредок вжати материял за нове закрице. Нове закрице кошта коло 600.000 динари, затераз за материял назберане 300.000 динари од Општини и спонзорох, та хиби назберац ище за другу половку.
Шкатули за добродзечни прилоги поставени на истих локацийох як и потераз кед ше зберало помоц – у предавальньох „Тренд би” (при Новим Населєню и у улїци Ю.Н.А.), у предавальнї „Фреш маркет”, „Виславски делови М”, „Транспортни центер Ковач” и у задруґи „Керестурска паприґа”, а понеже материял за закрице напредок обезпечело керестурске подприємство „Хела”, донациї мож однєсц и там.