Пред посланїками нови закони о образованю

автор блц/зам
866 Опатрене

БЕОҐРАД – У Народней скупштини Сербиї нєшка почина розправа о двох законох о образованю – Предлогу закона о основох системи образованя и воспитаня и Предлогу закона о високим образованю. Як наявели з Влади Сербиї, Закон о основох системи образованя и воспитаня би мал буц вершински просвитни закон, з хторим ше дава и векшу автономию установом у образованю.

З новим законом о образованю и воспитаню предвидзени и дзепоєдни нови ришеня, як цо то же ше директорох образовних установох будзе виберац виключно на основи компетенцийох, з обовязну обуку и лиценцованьом, а буду мац и преширеншу одвичательносц.

З Предлогом закона преширени одвичательносци хтори ше одноша на забрани насилства и дискриминациї, звекшани пенєжни кари за одредзени потупеня, а уводзи ше и нови воспитно-дисциплински мири, дружтвено-хасновиту и гуманитарну роботу.

Предписана и одвичательносц родичох за потупеня школярох у школи, а предвидзена и можлївосц снованя општинских совитох родичох.

По Предлогу закона о високим образованю акредитованє факултетох будзе окончовац Националне цело за акредитованє, а условиє студентох за упис на шлїдуюци рок студираня на терху буджету будзе 48 ЕСП боди.

Як Рутенпрес поинформовала народна посланїца Олена Папуґа, вона и єй колеґове з Лиґи социялдемократох Войводини Ненад Чанак и Нада Лазич на Предлог  закона о основох системи образованя и воспитаня придали 12 амандмани, хтори ше векшином одноша на образованє на язикох националних меншинох и улогу националних совитох у образованю. 

ПОВЯЗАНИ ТЕКСТИ