НОВИ САД – Всоботу, 2. юния, у новосадским шпиталю, после чежкей хороти умар наш познати писатель и професор Мирон Будински.
Мирон Будински єден спомедзи перших пейцох наших писательох постал член Дружтва писательох Войводини од 1971. року. Було му то вельке припознанє за кнїжку сказкох за дзеци „Воденїчка на стриберним потоку“, єдину кнїжку на руским язику котра дожила три свойо виданя!
Мирон Будински ше народзел у Руским Керестуре 19. фебруара 1931. року. Оцец му бул познати друкарски роботнїк и вельорочни театрални аматер у Руским Керестуре. Мирон основну школу закончел у своїм валалє, а 1. класу нїзшей ґимназиї школского 1943/44 року у Ужгородзе. 2, 3. и 4. класу нїзшей ґимназиї зоз одличним успихом закончел у Руским Керестуре и бул ошлєбодзени од покладаня малей матури. Висши класи ґимназиї зоз вельку матуру закончел у Бачким Петровцу 1951. року, а Природно-математични факултет у Беоґрадзе 1955. року.
Уж такой по законченю студийох, школского 1955/56 року, роби як професор у ґимназиї у Старей Пазови, а вец у индустрийней школи зоз практичну обуку од 1957. по 1960. рок. Од 1960. року постава асистент на Технїчним факултету у Новим Садзе и ту роби полни єденац роки. Потим роби як професор математики у ґимназиї у Србобранє од 1971. по 1973. рок. И, 1973. року ше конєчно враца на место фахового сотруднїка на Технїчни факултет у Новим Садзе и ту остава по 1996. рок, кед одходзи до пензиї.
Мирон Будински охабел вельки шлїд у рускей литератури, витвореней на тих наших просторох. Велї ґенерациї наших школярох у рамикох школскей лектири читали його „Воденїчку на стриберним потоку“, а його писнї и приповедки читали у „Пионирскей заградки“. Старши любителє нашей литератури уж од 1948. року у календарох, а од 1952. року и у часопису „Шветлосц“ мали нагоду читац його поетски и прозни витвореня аж по 1970. рок, кед пре обєктивни причини престал активно сотрудзовац зоз нашу периодику. Алє, його твори були и далєй заступени у наших антолоґийох, а обявйовани су и на сербским, словацким, українским, македонским и румунским язику. То найлєпши доказ же твори Мирона Будинского здобули тирвацу вредносц и достойне место у нашей култгурней скарбнїци.
Мирон Будински будзе поховани на вовторок, 5. юния 2018. року на Новосадским теметове, на 13,30 годзин.