ВЛАДИМИР КОЧИШ

Vladimir KocisВЛАДИМИР КОЧИШ народзени 4. септембра 1949. року у Дюрдьове. Стредню Машинско–технїчну школу закончел у Новим Садзе. Першу писню обявел 1965. року у Литературним слове. Пише поезию, прозу, драми а опробовал ше и як сценарист за документарни филми. Обявел кнїжки писньох: Вечера у белавим, Нови Сад (1985), Нєдзельови полудзенок, Петроварадин (1999), Ранша споведз, Нови Сад (2005) и кнїжки прози: Склєняне око, Нови Сад (1989), Паперови голуб, Нови Сад (1994) и Марунка, Нови Сад (2002), приповедки и писнї Борщ за Шевченка, Нови Сад, (2009), Лядова трава, Нови Сад (2013). Пририхтал Антолоґию поезиї войводянских Руснацох Жовта причасц, Смедерево (2003). Автор є драмох Подїї у сушедох, Ковертовани час, Крижалька, Косач и балерина, монодрамох Пес мой найлєпши приятель и Под образом. Вецей раз бул наградзовани на литературних конкурсох Руского слова, а за документарни филм При крижу достал награду на Медзинародним фестивалє у Ужгородзе (Україна). Филм приказовани и на медзинародних фестивалох у Беоґрадзе и Верони (Италия). Автор є и вецей текстох за нашо фестивали Червена ружа и Ружова заградка. Писнї и приповедки му прекладани на сербски, словацки, мадярски и українски язик. Заступени є у вецей антолоґийох войводянских писательох. Член є дружтва писательох Войводини.