НОВЕ ОРАХОВО – През три днї, од 25. по 29. авґуст, у Новим Орахове отримана културно-туристична манифестация Днї нового хлєба, шеснаста по шоре, чийо змисти провадзели числени Ораховчанє, госци зоз сушедних местох, як и з Мадярскей.
Пияток отримани „Бависка без гранїцох”, а участвовали вецей екипи школярох и младежи з вецей местох. Понеже були приявени вецей екипи, „Бависка” потривали до позно вноци.
Всоботу бул спортски дзень, дзе ше хлопски, женски и дзецински екипи змагали у малим фодбалє и кошарки. У малим фодбалє, спомедзи 5 екипох, победзела екипа з Ґунарошу, у женскей кошарки Ораховчанки були лєпши од екипи з Торньошу, док у конкуренциї когуцикох у малим фодбалє найлєпши були бавяче домашнєй „Славиї”.
Програма була найрижнороднєйша остатнї дзень манифестациї, внєдзелю, 27. авґуста (од дополадня до вечара), кеди отримане змаганє у вареню паприґашу з овчецини, вецей секциї ручних роботох орґанизовали виставу у голу Дому култури, а за наймладших орґанизовани рижни бависка, з назву „Улїца за бавенє”.
На лєтнєй бини пошвецени хлєб з нового жита, орґанизоване воженє на каруцох по валалє, а у културно-уметнїцкей програми участвовали КУД з Орахова, сушедних местох, алє и два дружтва з Мадярскей.
На концу културно-уметнїцкей програми учашнїком и присутним з пригоднима бешедами подзековали предсидатель Скупштини АП Войводини и Союзу войводянских Мадярох Иштван Пастор и предсидатель Совиту Месней заєднїци Нове Орахово Йожеф Фекеч.
Днї нового хлєба закончени з „улїчним балом”, хтори тирвал до позних ноцних годзинох.