КОЦУР – Вчера, 28. авґуста, на Кирбай у Коцуре нє виостали богата вашарска и часц за розвагу, насампредз за наймладших и младих, а валал бул полни од рана до вечара, понеже Коцурци, як и прешли роки, у своїх обисцох дочекали госцох – родзину и приятельох з других местох.
Понеже того року Кирбай бул пондзелок, уж у дньох викенду пред тим млади ше вечарами дружели у погосцительних обєктох у центре, дзе пияток и всоботу шицким присутним з Коцура и з других местох грали бенди и ди-джейове.
Часц за розвагу, як цо то луна-парк, на хторим ше забавяли наймладши, робел даскельо днї пред Кирбайом, а розвагу нашли и на рижних гомбалкох, конїкох, авточкох и гайзибанчкох.
Вашарска часц Кирбаю тиж була богата. Попри облєчива, прикраскох и козметики, шицки котри ю нащивели могли купиц и менши домашнї животинї, еґзотични древка и квеце, ручни роботи, як и нєзаобиходни лакотки. Красна хвиля тиж допринєсла нащивеносци тогорочного Кирбаю у Коцуре.
У орґанизациї Задруженя малинарох „Бачки малинаре”, на Кирбай у Коцуре отримана и перша манифестация „Бачка малина”, хтора у центре валалу, опрез Дому култури, позберала малинарох, продуковательох опреми за пестованє малини и рижни польопривредни подприємства. Були виложени и домашнї продукти з малинох, а свойо продукти и услуги представяли вецей подприємства котри малинаром понукаю рижну опрему и покарму за продукованє малини.