РУСКИ КЕРЕСТУР – У Руским Керестуре вчера, 22. марца, отримана штварта порядна схадзка Одбору за образованє Националного совиту (НС) Руснацох, на хторей бешедоване о планох за тот рок, а насампредз о проблемох у обласци образованя з хторима ше зочую школи и просвитни роботнїки у школох у хторих ше виучує руски язик.
У наиходзацим периодзе буду орґанизовани вецей образовни активносци, медзи нїма и стретнуце предшколских дзецох, того року у Дюрдьове штредком мая. Члени Одбору оценєли же друженє и упознаваню наймладших Руснацох з наших местох значне, алє визначене же би убудуце акцент дац и на руски язик, же би дзеци у интеракциї хасновали свой мацерински язик.
Лєтня школа руского язика у Попрадзе того року будзе од 17. по 23. юлий, гварене на вчерайшей схадзки. Як и дотераз, плановане же би на нєй участвовали од 30 до 35 основношколци з наших местох, котри пейц днї буду мац рижни преподаваня и роботнї з руского язика, историї, ґеоґрафиї, виронауки, музики и спортски активносци.
На вчерайшей схадзки присуствовали и нови совитнїци-вонкашнї сотруднїци Школскей управи Зомбор Наталия Будински з Руского Керестура и Школскей управи Нови Сад Весна Цветанович з Нового Саду. Вони Одбор за образованє поинформовали о їх улоги шириц приклади добрей пракси, як и же уж закончели фахове усовершованє за совитнїкох, а тераз чекаю дальши крочаї.
На схадзки були и членїца НС и директорка Школи „Петро Кузмяк” Хелена Пашо Павлович и педаґоґ у тей школи Любица Няради, котри винєсли дотерашнї почежкосци з хторима ше Школа зочовала пре законски нєреґуловани упис школярох з України до нашей Ґимназиї.
Гоч тота пракса зажила ище пред даскельо роками, як поведзене, дотераз нїч нє поробене на координациї и прилагодзованю законским можлївосцом, односно на обезпечованю леґалного пребуваня и школованя штредньошколцох з України у руским оддзелєню Ґимназиї.
Як начишлєла Нярадийова, у складзе зоз законскима можлївосцами треба орґанизовац приход и одход тих дзецох, понеже су малолїтни – треба дац ґаранцию же ше хтошка о нїх ту будзе старац, обезпечиц им здравствене осиґуранє итд.
Пре велї потребни активносци и проблеми хтори треба ришиц за леґализованє школованя дзецох з иножемства, на препоруку НС Одбор вчера меновал Акцийну ґрупу хтора на тим будзе робиц. До Ґрупи меновани Любица Няради, Миломир Шайтош, Желько Ковач и Тат`яна Бучко Рац, а поведзене же по тим питаню Акцийна ґрупа нєпреривно будзе у контакту з предсидательом НС Славком Рацом и директорку Школи Хелену Пашо Павлович.
Одбор за образованє НС на вчерайшей схадзки прилапел вимогу Дружтва за руски язик, литературу и културу же би ше виховательки Александри Колбас, котра у Новим Садзе роби на виучованю руского язика з предшколскима дзецми и пре тото путує з места биваня, обезпечело средства за драгово трошки.