ВЕРБАС – Тим за вонкашнє вреднованє основних школох (екстерна ревизия) оценєл з найвисшу оцену – „штверку”, цалсну образовну систему и роботу у Основней школи „Братство-єдинство” у Вербаше. У рамикох вреднованя квалитету роботи, екстерни надпатрунок у тей школи окончени 30. новембра прешлого року, а после осем тижньох анализи спатреного, до тей образовней установи сцигол службени звит Школскей управи Нови Сад, у хторим ОШ „Братство-єдинство” оценєта з найвисшу можлїву оцену.
У Вербаше и вербаскей општини то за остатнї рок друга ОШ хтора ше може похвалїц з найвисшу оцену за роботу достату од Школскей управи Нови Сад, понеже „штверку” достала и вербаска ОШ „Светозар Милетич”.
З вєдно 30 стандардох, ОШ „Братство-єдинство” витворела 28, цо представя 93,33 одсто, медзи нїма и 15 стандарди ключни за вреднованє, односно 100 одсто ключних стандардох. Понеже ше з оцену 4 оценює установу хтора витворює вецей як 75 одсто стандардох, уключуюци и 100 одсто ключних за вреднованє, то барз вельки успих у роботи – сообщенє з ОШ „Братство – єдинство”.
По словох директорки Славици Шестович, заняти у Школи ше найвецей цеша з фактом же шицки индикатори хтори провадза наставни процес оценєти з найвисшу можлїву оцену – „штверку”, цо доказує квалитет настави у тей школи. Як гварела, у службеним звиту Тиму вонкашнїх евалуаторох визначене же ОШ „Братство-єдинство” може буц приклад другим таким установом.