БЕОҐРАД – Концом юния беоґрадска видавательна хижа „ДАН-ґраф” обявела кнїжку „Кратка история України” авторох Аркадия Жуковского и Ореста Субтельного, преноши сайт „Шлєбодна Европа” по українски.
Кнїжку преложели преподаваче Оддзелєня русинистики проф. др Янко Рамач и мр Анамария Рамач Фурман, а видаванє финансийно потримало Министерство вонкашнїх дїлох України.
„Шлєбодна Европа” пише же у кнїжки, як додаток, обявени и дванац есеї о познатих Українцох од Ярослава Мудрого и краля Данила Романовича по Мазепу, Сковороду, Шевченка, Франка, Довженка и Лїну Костенко. Тоти статї написали сербски українисти Людмила Попович, Дюра Гарди, Михайло Рамач и прекладаче „Краткей историї України”.
Кнїжку „Кратка история України” предсидатель України Петро Порошенко под час своєй нащиви Беоґраду початком юлия явно пред медиями подаровал предсидательови Сербиї Александрови Вучичови.