Вишло марцовске число „Заградки”

автор рим
1k Опатрене

НОВИ САД – Насловни бок новей, марцовскей „Заградки” пошвецени наймладшим сотруднїком того часопису – предшколским дзецом з Дюрдьове и дзецом з Руского Керестура, а рубрика „Фото памятки” представя учашнїкох на општинских смотрох рецитаторох. З фотоґрафиями илустровани информациї о школярских програмох у Керестуре, Вербаше, Новим Садзе и Дюрдьове, мож пречитац на 18. и 19. боку „Заградки”.

У литературней часци часопис приноши весели стихи писательох Меланиї Павлович, Силвестера Макая и Ирини Гарди-Ковачевич, та приповедки Славици Милошевич, Радета Обреновича, басну Штефана Чакана и єдну поучну руску народну приповедку. Представена и нова кнїжка приповедкох по сербски Меланиї Римар, а за любительох театру ту драмска сличка „Наш бачи Страка” Ґвиду Тарталї.

Школярски литературни и подобово роботи у новей „Заградки” виполнєли аж пейц боки, а того мешаца найвреднєйши були школяре з Вербасу.

Ту и забавни боки, як и стаємни рубрики „2000 роки християнства”, „Вериш? Нє вериш?” и виривки з „Пионирскей заградки” зоз 1953. и 1964. року.

ПОВЯЗАНИ ТЕКСТИ