НОВИ САД – Вчера вишло авґустовско-септемберске двочисло часопису МАК, дзе у рубрики „У фокусу” призначени младежски лєтнї збуваня, а ту и вистка о новей рускей рок-шпиванки кантавтора Михаила Рамача з Дюрдьова, з назву „Смаркошка”.
Нову композицию мож послухац на МАК-овим Ютюб каналу (Mihail Ramac – Smarkoska), як и на сайту makmagazine.bandcamp.com, дзе ю мож и безплатно презняц.
У рубрики „У фокусу” и интервю з двойнятами Кристину и Лидию Горняковима з Дюрдьова, успишнима школярками и активнима членїцами дюрдьовского КУД „Тарас Шевченко”, потим розгварка з Владимиру Буила з Керестура о єй гобию – мальованю, а у тим двочишлє представени и МАК-ов длугорочни сотруднїк Борис Ройко з Руского Керестура.
У „Упечаткох” призначене як прешол тогорочни „Еґзит”, як и „Сиґет” фестивал у Мадярскей, а „Швет науки и технолоґиї” пише о Терези Будински и Маркови Буилови, котри участвовали у єдним проєкту у иножемстве.
„Спорт и рекреация” представя Ивану Виславски з Панчева, котра ше занїма зоз штреляцтвом, як и Николу Регака, фодбалского ґолмана з Нємецкей.