Врацели ше паломнїки з Лурду

автор маф
1.2k Опатрене

РУСКИ КЕРЕСТУР/ЛУРД – Штерацецседемеро паломнїки, хтори у орґанизациї керестурскей парохиї од 27. априла по 4. май були на паломнїцтву у Лурду, задовольни ше врацели прешлого пиятку. Попри Лурду нащивели и даскельо городи у Италиї и Франдузкей.

Як за Рутенпрес спред орґанизатора виявел парох керестурски о. Михайло Малацко, паломнїцтво було вельке дожице понеже шицки отамаль пришли иншаки, т. є. духовно преглїбени и збогацени.

У Лурду, дзе пребули два днї и три ноци, под саму пещеру мали нагоду служиц нашу Службу Божу вєдно з паломнїками з Ужгороду з України, и участвовали у вецей подїйох цо ше там случую.

На драги там и назад зашли нащивиц и велї места у Падови, Верони и Милану у Италиї, як и твердинї у Каркасону и Авиньону у Французкей.

У Лурду з тей нагоди найвецей паломнїкох було з Керестура, Коцура и Нового Саду, а по даскельо и з Дюрдьова, Индїї и Вербасу. Як наглашел о. Малацко, лурдеска побожносц барз преширена у нашим народзе и нашей церкви, алє остатнїраз нашо паломнїки у Лурду були пред вецей як 40 роками.

ПОВЯЗАНИ ТЕКСТИ