РУСКИ КЕРЕСТУР – Основна школа „Петро Кузмяк” вчера вечар шветочно випровадзела 50-ецерих своїх малих матурантох и на окремней шветочносци им уручени дипломи. Леон Юрич преглашени за школяра ґенерациї, а Леонтий Сивч за найлєпшого школяра VIII-б оддзелєня.
Школяре у шветочней колони зоз школи пошли до Велькей сали Дому култури дзе им програму випровадзаня пририхтали їх товарише зоз седмей класи.
Директорка Школи Хелена Пашо Павлович, им и родичом, повинчовала законченє осемрочного школованя, пожадала дальши успих и поволала уписац ше и до Штреднєй школи до Ґимназиї на руским и сербским язику, и на напрям туристични технїчар.
Вона и оддзелєнски старшини Каролина Папуґа и Саня Тиркайла им потим уручели дипломи о законченей осмей класи хтору з одличним успихом закончели 25-еро школяре, з барз добрим седмеро и з добрим штверо, а велї школяре достали и дипломи за окремне закладанє з поєдинєчних предметох.
Медзи одличнима школярами шесцеро достали Вуково дипломи – попри Леона Юрича зоз VIII-а оддзелєня то ище Йована Казак, Давид Надь и Теодора Русковски, а з VIII-б попри Леонтия Сивча и Михайло Рацпети.
После шветочносци школяре зоз своїма наставнїками пошли до школскей терпезариї дзе мали матурски вечар.