СЕРБИЯ – Вчера, 8. юния, у велїх местох у Сербиї, од 17 до 19 годзин отримани протест пре високу цену горива, котри нєзадовольни гражданє виказали зоз застановйованьом своїх превозкох на найфреквентнєйших драгох. Вони вимагаю же би гориво було туньше, та же би литра безоловного бензину коштала 120, а дизелу 110 динари.
Як преноши РТВ и други медиї, протести отримани у Беоґрадзе, Новим Садзе, Зомбору, Нишу, Пожаревцу, Лесковцу, Панчеву, Шабцу и Новим Пазару, алє и у велїх менших городох як цо то Вербас, Кула, Коцур, а була блокирана и драга Кула-Руски Керестур, цо видно на дружтвених мрежох.
Коцурски парасти и жителє у Коцуре ше придружели протесту так же коло 20 превозки, односно трактори и авта на 17 годзин на пол годзини застановели транспорт на главней драги, опрез Месней заєднїци.
