Вше вецей заинтересованих продуковательох

автор Ясмина
1.2k Опатрене

Карфиол мож садзиц як други урожай на истей поверхносци, зоз контраченьом продукователь зна цену по котрей го преда, а найважнєйше же ма и сиґурного купца. То главни причини чом ше вше векше число заградкарох опредзелює за продукцию тей желєняви.

У Руским Керестуре, медзи иншу желєняву пестує ше и карфил, а розвою заградкарства вшелїяк же допринєсла робота Хладзальнї у добрих часох, котра роби и нєшка, алє дакеди то було цалком иншак. Велька часц випродукованей желєняви могла буц предата и преробена праве у нєй.

Вшелїк же зоз препаданьом Хладзальнї нє препаднул и валал, алє напроцив, заградкарство з рока на рок постава вше моцнєйше и розвитше. Поверхносци под рижнима заградкарскима културами у валалє вше векши. Правда, водзацу улогу ма, так повесц, уж брендирана керестурска паприґа, медзитим, исти одкупйоваче роботу пренашли и зоз иншим.

ВЧАСНА ЖАТВА, ВЧАСНИ И КУЛТУРИ

Так подприємство „Изґлед” уж даскельо роки понука контраченє продукциї карфиолу, за цо єст интересентох и з валалу, а и з других околних местох. Контрача єшеньски карфиол, а вєдно з нїм и броколи, чия продукция ше роби як друга култура на поверхносцох дзе витлачени ярец.

Вше вчаснєйши початок жатви, резултує и зоз вчасним єшеньским карфиолом. Перши ярци були витлачени уж 2. юния, а потим було потребне лєм дасклеьо днї же би ше карфиол пресадзело на истей парцели.

Продукователє карфиолу нє понагляли праве так, понеже за єшеньску продукцию карфиол потребне пресадзиц концом юния, початком юлия.

– Кооперантох маме зоз валалу, алє и з Коцура и околних местох – гварела Еуфемия Чизмар у мено одкупйовача „Изґлед”. – Попри законтрачених количествох, вєшенї на одкупу береме и продукт котри зме нє законтрачели, понеже у валалє єст надосц и таких продуковательох.

Зоз контрактом понукаме сиґурни одкуп и цену, вєшенї потребне лєм принєсц продукт нам на одкупне место. Ми обезпечуєме бокс палети котри даваме людзом такой на польо, и о нашим трошку ше финансує превоз роби до Хладзальнї з котру сотрудзуєме – потолковала Чизмарова.

НАШЕНЄ МОЖ ДОСТАЦ

З подписованьом контракту продукователь може достац нашенє, а кед сце може и готову пресаду, котра досц драгше винєше, а за цо ше ридко хто опредзелює.

– Шицки продукователє ше опредзелєли за нашенє и тото же сами продукую пресаду у контейнерох, дзе нєт тельо утрати и котру лєгчейше випестовац. Векшина продуковательох ше опредзелєли за пестованє карфиолу чия тогорочна цена 0,17 еври, а ище вше ше обаваю од пестованя броколия котри одкупюєме по 0,32 еври – констатовала Чизмарова.

Причина меншей заинтересованосци за садзенє броколия то же його продукция вимага вецей бриґи, главки ма менши и вельо лєгчейши, алє вшелїяк же є з таку цену рентабилни, а за искусних продковательох нє муши буц чежки за продукцию.

ВЕЛЬКОСЦ ГЛАВКИ НЄ УСЛОВИЄ ЗА ОДКУП

Подписани контракт вшелїяк же єдна файта сиґурносци за продукователя, без огляду чи ше роби о векших чи о менших поверхносцох. Карфиол котри ше одкупює идзе за дальши преробок, а нє до предавальньох, прето на одкупним месце у Руским Керестуре нє условюю зоз велькосцу главкох котри ше зрезує.

Важне же би главки нє були преквитнути, а новши файти карфиолу наисце оставаю млади, били и заварти, дакеди аж и до велькосци од пейц кили.

– Дзпоєдни нашо кооперанти скорей як з нами, контрачели зоз другима одкупйовачами, та були условйовани зоз количеством кельо дньово можу випоручиц, а главка нє шмела буц векша як єден килоґрам. Нам велькосц нє битна, лєм кед є нє преквитнута. Кед ше так подцагнє рахунок, вшелїяк же ше баржей виплаци зрезац векшу главку по тей цени, а то нам потвердзую нашо продукователє – гварела Чизмарова.

Вельо того завиши од файти, а вибор правого нашеня значи вельо векши урожай, з тим и заробок. Подприємство „Изґлед” того року ма законтрачено 1 000 тони карфиолу, обчекую ище вецей на одкупу, цо нє будзе проблем.

З искуства од прешлого року, тей сезони шицки кооперанти посадзели нашенє файти „бянка” французкей нашеньскей хижи, чийо главки рошню и до пейц килограми, а длуго су заварти и цалком збити.

ВИМАГА РОБОТУ И БРИҐУ

На поверхносци штири гольти карфиол посадзел уж по други рок и Керестурец Янко Няради, котри попри роботи у фамелийней фирми сцигнє ше дополнююцо занїмац и зоз заградкарством.

– Карфиол садзим од прешлого року, мал сом три и пол гольта, а тераз сом звекшал на штири. Од початку сотрудзуєм зоз спомнутим одкупйовачом и можем повесц же сом задовольни. Нашенє купуєм сам, а пресаду сом дал услужно одховац до Челарева.

О обчекованим урожаю нє мож вельо напредок бешедовац. У сезони режеме главки медзи килу и три килограми. Садзим „бянку”, то гибрид, алє фаховци толкую же то нєдоробена сорта котра ше ту на нашим терену указала наисце добре – визначел Няради.

– Садзим без фолиї, пресадзуєм машински, правда за машину потребне же би ходзела особа котра контролує, алє садзенє идзе досц швидко, а залївам од горе зоз тифоном. Карфиол вимага надосц роботи и бриґи, скоро кажди дзень єст у нїм даякей роботи, поготов кед подрошнє. Раз го треба окопац, та заляц, опирскац и так до круга, алє вшелїяк же то сцигуєм и попри роботи – пренєсол свойо искуства Янко.

Карфиол заградкарска култура чия приповедка о продукциї наисце єдинствена, а сиґурносц у цени и количеству наисце прицагуюца, Искуства продукциї карфиолу скорейших рокох гуторя же було роки кед тот продукт нє могло предац анї по вельо нїзшей цени на конзумним тарґовищу.

Вшелїяк же и карфиол рошлїна котра вимага бриґу и допатранє, з тим же заградкаре знаю же скоро кед би нє було файти чкодлївих инсектох котри напастую карфиол. Люби вельо води и прикармйованє зоз азотнима штучнима гноями.

НОВИ ФАЙТИ РЕЛАТИВНО ОДПОРНИ

Цо ше дотика рижних охореньох, нови файти релативно одпорни, та ше виплаца єден, або два превентивни третмани. Позни єшеньски файти ше по гектару садзи коло 33 000 рошлїни, а велька вигодносц кед ше го садзи после ярцу, та ше у истей сезони парастови уда позберац заробок по други раз. Можебуц зоз житаркох як цо то ярец нє заробок за хвалєнє, алє праве тоти култури идеални за предкултуру пред велїма заградкарскима културами, та и тих з фамелиї капустох.

ПОВЯЗАНИ ТЕКСТИ