НОВИ САД – Руководителька Оддзелєня славистики на Педаґоґийним универзитету у Кракове, у Польскей, професорка Олена Дуц-Файфер и студенти Петро Козминьски и Каролина Новак, вчера нащивели Оддзелєнє за русинистику на Филозофским факултету у Новим Садзе и нашо медийни хижи – НВУ „Руске слово” и руску редакцию РТВ Войводини.
Обидвойо студенти на трецим року славистики, на русийско-лемковскей ґрупи, а нащива нашим местох и институцийом порядна активносц у їх наставней програми.
На Оддзелєню за русинистику госцох привитали професор др Михайло Фейса и асистент на нашей Катедри ма Александер Мудри, як и двоме студенти на першим року студийох. Бешедоване о студийох у Новим Садзе и Кракове, о почежкосцох з хторима ше стретаю студенти и яки уплїв маю други язики на ученє руского, односно лемковского язика на їх факултетох.
Проф. Фейса спомнул же вчерайши дзень бул историйна хвилька на Катедри – и пре нащиву госцох з Польскей, алє и прето же праве вишла кнїжка „Русинистични студиї” Оддзелєня за русинистику, у хторим и два теми цесно вязани за Лемкох. Госци обишли и семинарску библиотеку за славистику.
У НВУ „Руске слово” госцох привитали одвичательни редактор новинох „Руске слово” др Борис Варґа и одвичательна редакторка „Заградки” Мелания Римар. Варґа накратко представел историят тей видавательней хижи од єй перших крочайох по нєшка, шицки єй виданя и потолковал функционованє тей нашей установи.
Бешедоване и о проблемох, насампредз о нєдостатку русинских институцийох у Польскей, алє и о можлївосцох преглїбйованя вязох з Лемковину, попри у науковей, и у велїх других обласцох.
Пред вечаром госци з Польскей нащивели и РТВ Войводини, дзе их привитал одвичательни редактор рускей редакциї Мирко Канюх.
