НОВЕ ОРАХОВО – Всоботу и внєдзелю, 25. и 26. авґуста, у Новим Орахове на спортских теренох отримана 17. Културна манифестация „Днї нового хлєба”.
Перши дзень манифестациї бул пошвецени младим и спорту. Отримани турнир у малим фодбалу на хторим участвовали дзевец екипи, а найлєпша була екипа зоз Нового Орахова. Друге место освоєла екипа зоз Ґунарошу, а треце екипа „Фламенґо” зоз Нового Орахова. На турнире найвецей публики було на стретнуцу екипох когуцикох зоз Торньошу и Нового Орахова. И на тим стретнуцу лєпша була екипа зоз Нового Орахова хтора победзела своїх парнякох зоз резултатом 7:4.
Пополадню истого дня отримани „Бависка без гранїцох” на хтори ше приявели шейсц екипи, а змагали ше у вецей активносцох. Найлєпша екипа у бавискох була „Треф 6” хтора у составе мала штирох членох зоз Нового Орахова и двох зоз Канїжи.
По конєц першого дня манифестациї на отворених спортских теренох у Новим Орахове указани схопносци любительох канґуу, фитнесу и зумби на хторим участвовали вецей як трицец учашнїки. У забавней часци хтора почала после спортских змаганьох отримана „журка” на хторей младах забавяли Ди Джей Муки и ґрупа „Фрик аут”.
Нєдзеля тиж була наменєна за змаганє, алє старших – у вареню паприґашу. На тото змаганє ше приявели штернац екипи, а три найсмачнєйши паприґаш, по оцени специялней комисиї, достали награди. Потим отворена вистава ручних роботох и дзецинска часц програми хтору орґанизовала школа и учительки зоз своїма школярами, под назву „Улїца за бавенє”.
Клуб стрилцох зоз Байши указали свою схопносц у цильованю зоз стрилами, а шицки присутни могли коштовац вино хторе принєсло Здруженє винарох зоз Карасу зоз Мадярскей. Тиж так, отримана и деґустация бухтох хтори порихтали жени зоз форуму „Армида”.
Того року на манифестациї першираз отримане и шветочне наградзованє давательох креви.
У културно-уметнїцкей програми, хтора потим отримана, участвовали дзешец културно-уметнїцки дружтва – зоз Ґунарошу, Кевию, Торньошу, Сузи (Република Горватска), Пачиру, Байши и зоз Сентешу у Мадярскей. Члени КУД „Жатва” зоз Коцура ше на манифестациї у Новим Орахове представели зоз шпиванку „Панонска ровнїно” хтору одшпивала Дарина Михнякова у провадзеню Любомира Сакача на гармоники. Фолклорни ансамбл одтанцовал хореоґрафию „Коло водички” хореоґрафа Владимира Ивана.
После пошвецаня нового хлєба, програма тирвала до позних годзинох, а закончена є после концерту Золтана Берецкия зоз Мадярскей и Жарка Прибаковича зоз Бачкей Тополї и „Улїчного балу” на хторим грал оркестер „Хомокора” .
Як и потераз, манифестацию орґанизовала Месна заєднїца Нове Орахово у сотруднїцтве зоз цивилнима здруженями и орґанизациями у валалє и з Општину Бачка Тополя. Вельку помоц обезпечели и числени спонзоре.