СУБОТИЦА – Делеґация Орґанизацийного одбору за Централну шветочносц означованя Националного швета Руснацох у Сербиї Заводу за културу войводянских Руснацох (ВР), хтора у януаре идуцого року будзе у Суботици, вчера, 7. септембра, нащивела Городску хижу у Суботици, у хторей буду отримани вецей змисти у рамикох централней програми означованя нашого швета.
Нащива орґанизованa насампредз пре спатранє технїчних условийох того простору, понеже би у сали „Велька рада” („Велика већница”), мала буц Шветочна академия, у „Вестибилу” вистави уметнїкох зоз Суботици, а у „Белавей сали” промоция моноґрафиї. З членми Орґанизацийного одбору у Суботици вчера була и екипа РТВ.
Перша схадзка Орґанизацийного одбору за Централну шветочносц означованя Националного швета Руснацох у Сербиї у Заводзе за културу ВР отримана 22. авґуста, а до Орґанизацийного одбору (за тераз) меновани Олена Планчак Сакач, за предсидательку и як особа задлужена за обдумованє и пририхтованє програмох Централней шветочносци, Иван Гарди, Олґа Карлаварис, Мария Тот, Татяна Колєсар Ґвоїч, Ґабриєла Саянкович и Анамария Ранкович. Членство у Орґанизацийним одборе будзе дополньоване.
На першей схадзки Орґанизацийного одбору присуствовал и предсидатель Упрaвного обору Зaводу за културу ВР Миломир Шайтош, котри з тей нагоди гварел же у одношеню на дотерашнї, Централна шветочносц означованя нашого швета нарок у Суботици вироятно будзе по одредзеней новей концепциї.
