ВЕРБАС – Зоз покладаньом венцох на памятнїки погинутим борцом означени 20. октобер – Дзень ошлєбодзеня Вербасу у Другей шветовей войни. Того дня у центру городу зоз пригодну програму, шпиванками дзецинского хору и рециталами котри порихтали школяре вербаских основних школох, означени 82 роки од ошлєбодзеня Вербасу.
На Памятнїк жертвом фашизму у центру Вербасу, дзе и отримана святочна програма, венци положели представителє општини Вербас на чолє з предсидательом ОВ Миланом Ґлушцом, предсидателька СО Тияна Алексич, заменїк предсидателя ОВ Йован Ковачевич, делеґация Општинскей орґанизациї СУБНОB, як и представнїки орґанизацийох СУБНОВ сушедних општинох, представнїк Амбасади Рускей Федерациї у Сербиї, представнїк Амбасади України у Сербиї, представнїки Основней школи „20. октобер”, представнїки Єврейскей општини Нови Сад, локални одбори политичних странкох СНС, СПС, ПУПС, представнїки Здруженя сербско-русийского приятельства Род, Здруженя резервних официрох и других гражданских орґанизацийох и дружтвох.
Як знак здогадованя на погинутих борцох и жертви, венци того дня положени и на Памятнїк жертвом фашизму на Городским теметове, на Памятнїк шицким жертвом войнох у бувшей СФРЮ од 1991. по 1999. рок, як и на Памятнїк погинутим вояком Червеней армиї.
Програма була пошвецена даваню чесци тим котри страдали, а шпиванки и стихи були виполнєни зоз здогадованями на дзень кед 1944. року закончена окупация городу и отворена драга ґу животу у шлєбоди.
Часц програми у котрей ше ґу присутним зоз пар словами озвал предсидатель општини Вербас Милан Ґлушац була провадзена зоз гвизданьом, пищалками и кричаньом ґрупи присутних гражданох и студентох, симпатизерох Студентскей лїстини – Студенти победзую.
