ЛОВРАН/РИЄКА/МАТУЛЇ/РЕПУБЛИКА ГОРВАТСКА – У периодзе од 10. до 18. мая у Ловрану, Риєки и Матульох у Републики Горватскей ше отримує 14. културна манифестация „Тидзень култури Руснацох и Українцох Приморско-ґоранскей жупаниї”, а на котрей наступя и аматере Дома култури Руски Керестур.
На културну манифестацию до Горватскей спред Дома култури Руски Керестур нєшка рано одпутовали танєчни Виводзацки ансамбл, оркестри и двойо солисти. Перши наступ заплановани такой нєшка, а под час госцованя отримаю вкупно три вечарши концерти, по єден у каждим месце дзе ше отримує фестивал. Соботу пред поладньом буду учашнїки дефилеу у Риєки.
Манифестацию орґанизує Културне дружтво Руснацох и Українцох „Рушняк” Приморско-ґоранскей жупаниї и Союз Руснацох Републики Горватскей, а под покровительством Совиту за национални меншини Републики Горватскей, з потримовку Городу Риєка, Општини Матулї и Општини Ловран.
(На насловней фотоґрафиї єден зоз скорейших наступох Виводзацкого ансамблу)