РУСКИ КЕРЕСТУР – До Катедралней церкви св. оца Миколая, вчера по вечаршей Служби Божей, сцигол Вифлеємски огень хторого уж треци рок ту приноша тройо представителє Скаутскей орґанизациї „Пластуни” зоз Закарпатя.
Огень и скаутох привитал капелан о. Михайло Шанта и вирним потолковал же тот огень у запалєней швички зоз Вифлеєму з места Исусового народзеня ше розноши по велїх жемох Европи, та и до Керестура. Вирни го превжали зоз своїма швичками, а треба их дома запалїц з нагоди наиходзацого Крачуна.
Вифлеємски огень керестурски парохиянє зоз швички у штред церкви годни превжац кажди дзень у Службох Божих, аж по саме швето, а тих дньох сцигнє и до Коцура.
